Павел Баркоўскі прапанаваў дэпутатам Вярхоўнай Рады Украіны чатыры ключавыя моманты для паляпшэння адносінаў паміж народамі
2026-05-30
У сераду ў межах візіта дэлегацыі Святланы Ціханоўскай у Кіеў адбылася сумесная сустрэча дэмакратычных сіл Беларусі, Камітэта па пытаннях еўраінтэграцыі Вярхоўнай Рады Украіны з дэпутатамі міжфракцыйнага аб’яднання «За дэмакратычную Беларусь» на чале з сустаршынём Вадзімам Галайчуком.
Сустрэча прайшла ў прысутнасці спецыяльнага пасланніка ў справах Беларусі Яраслава Чарнагора, а таксама суддзі Канстытуцыйнага суда Украіны Юрыя Барабаша.
З беларускага боку на сустрэчы прысутнічалі дарадца Офіса Святланы Ціханоўскай Анатоль Лябедзька, кіраўніца Місіі дэмакратычных сіл у Кіеве Святлана Шаціліна, прадстаўнікі Аб’яднанага Пераходнага Кабінета — глава апарату і лідар фракцыі КР «Еўрапейскі выбар» Валер Мацкевіч, прадстаўнік па нацыянальным адраджэнні Павел Баркоўскі, прадстаўніца па сацыяльнай палітыцы Вольга Зазулінская, а таксама яе намесніца па кірунку працы з дабраахвотнікамі і іх сем’ямі Анастасія Махамет.
Асноўныя абмеркаванні датычыліся вырашэння сацыяльных пытанняў, легалізацыі, пастаяннага пражывання і паляпшэння ўмоў знаходжання грамадзян Беларусі ва Украіне.
Асобнай увагі заслужылі пытанні еўрапейскага выбару, які дэкларуюць дэмакратычныя сілы як прапанову для беларускага грамадства, а таксама пытанні канстытуцыйных рэформаў і стварэння ў будучыні прававой дэмакратычнай дзяржавы.
Прадстаўнік па нацыянальным адраджэнні Павел Баркоўскі падкрэсліў, што, нягледзячы на жорсткую антыеўрапейскую прапаганду і дэзынфармацыю, якую пашыраюць праўладныя і пракрамлёўскія крыніцы і медыя, беларусы на працягу апошніх 20 гадоў у цэлым станоўча ставяцца да ідэі еўраінтэграцыі.
Паводле дадзеных сацыялагічных апытанняў, падтрымка еўраінтэграцыі сярод беларусаў стабільна знаходзіцца ў дыяпазоне 20–40% — у залежнасці ад узроўню ціску на грамадскую думку.
Павел Баркоўскі прапанаваў дэпутатам Вярхоўнай Рады звярнуць асаблівую ўвагу на 4 ключавыя моманты для паляпшэння ўзаемадзеяння паміж народамі:
1. Статус беларускай мовы
Не толькі як мовы беларускай меншасці, а шырэй — на дзяржаўным узроўні, каб пазбегнуць фактаў яе дыскрымінацыі на лакальным узроўні ў дзяржаўных установах і службах Украіны. Падчас сустрэчы прыводзіліся канкрэтныя кейсы.
2. Паляпшэнне ўмоў для адукацыі беларусаў
У тым ліку вяртанне да нормы аднабаковага прызнання дакументаў аб адукацыі, выдадзеных у Беларусі, для аблягчэння паступлення беларусаў у навучальныя ўстановы Украіны; стварэнне спрыяльных умоў для навучання беларусаў па шэрагу спецыяльнасцяў ва ўніверсітэтах Украіны; а таксама стварэнне пляцовак для супольнага абмеркавання праграм рэформаў адукацыі з украінскімі экспертамі.
3. Культурніцкая супраца
Пасыланне адназначнага сігналу пра важнасць і дапушчальнасць украінска-беларускіх культурніцкіх кантактаў паміж арганізацыямі і фондамі Украіны і беларускай незалежнай культурніцкай супольнасцю. Напрыклад, праз стварэнне спецыяльнай праграмы ці фонда падтрымкі сумесных украінска-беларускіх культурных праектаў.
4. Супраца ў інфармацыйным полі
Стварэнне пастаянна дзеючай міжнароднай групы, якая б займалася распрацоўкай супольных наратываў, агульнымі дзеяннямі па паляпшэнні іміджу беларускага і ўкраінскага народаў у вачах адзін аднаго і інфармацыйным супрацівам варожай прапагандзе.
@CabinetBelarus
