Рада Еўропы рыхтуе чарговы план дзеянняў па супрацоўніцтва з дэмакратычнымі сіламі, якая прадугледжвае рэалізацыю пятнаццаці праектаў
2026-02-20
Сустрэчы з кіраўніком прадстаўніцтва Рады Еўропы ў Варшаве Ежы Баўрскім і амбасадарам Германіі ў Варшаве Мігелем Бергерам правёў намеснік кіраўніцы Аб’яднанага Пераходнага Кабінета, дэлегат Каардынацыйнай Рады Павел Латушка.
У ходзе сустрэчы з кіраўніком прадстаўніцтва Рады Еўропы ў Варшаве Павел Латушка дэталёва праінфармаваў пра працу дэлегацыі Каардынацыйнай Рады ў Парламенцкай асамблеі Рады Еўропы, а таксама пра прынятыя ПАРЕ дакументы па ініцыятыве беларускай дэлегацыі і папраўкі, унесеныя ў гэтыя дакументы па прапанове дэлегатаў Каардынацыйнай Рады.
Адначасова былі абмеркаваны перспектывы далейшага пашырэння супрацоўніцтва як з прадстаўніцтвам Рады Еўропы ў Варшаве, так і з Радай Еўропы ў цэлым. Размова ішла пра арганізацыю сустрэч, накіраваных на больш шчыльнае ўзаемадзеянне па пытанні прыцягнення Лукашэнкі да адказнасці за здзяйсненне акта агрэсіі ў дачыненні да Украіны — у сувязі з тым, што Рада Еўропы выступіла ініцыятарам стварэння Спецыяльнага трыбунала па адказнасці за агрэсію супраць Украіны. Адпаведнае пагадненне было падпісана 25 чэрвеня Прэзідэнтам Украіны Уладзімірам Зеленскім і Генеральным сакратаром Рады Еўропы Аленам Берсе.
Прадстаўнік Рады Еўропы паведаміў, што ў найбліжэйшы час плануецца прыняцце чарговага плана дзеянняў па супрацоўніцтве з дэмакратычнымі сіламі Беларусі, які прадугледжвае рэалізацыю пятнаццаці праектаў.
Падчас сустрэчы з паслом Германіі Павел Латушка прадставіў інфармацыю пра ўнутрыпалітычную сітуацыю ў Беларусі і рэпрэсіі, узровень якіх не змяншаецца. Таксама праінфармаваў пра дапамогу, якую аказваюць Аб’яднаны Пераходны Кабінет і праваабарончыя арганізацыі ў легалізацыі і сацыялізацыі вызваленых палітвязняў у Польшчы.
Адначасова Павел Латушка паінфармаваў пра крызісную эканамічную сітуацыю ў Беларусі, выкліканую ўнутранай рэпрэсіўнай і знешняй агрэсіўнай палітыкай рэжыму Лукашэнкі. Была адзначана важнасць накіравання выразных сігналаў рэжыму Лукашэнкі аб неабходнасці змены палітыкі, у тым ліку праз павелічэнне санкцыйнага ціску.
Асобны акцэнт быў зроблены на неабходнасці пачатку дыялогу прадстаўнікоў функцыянальнай улады з беларускім грамадствам з выкарыстаннем інструмента «круглага стала», што магло б адкрыць магчымасці для выхаду з глыбокага ўнутрыпалітычнага крызісу ў Беларусі і захавання незалежнасці дзяржавы.
@CabinetBelarus
