Павел Латушка: Мы не змірыліся са смерцю Рамана і не забыліся тых, хто яго забіў
2025-11-12
Сёння, 12 лістапада, спаўняецца пяць гадоў з трагічнай смерці Рамана Бандарэнкі. Пяць гадоў таму ён быў жорстка забіты ў двары свайго дома. Раман быў забіты толькі за тое, што ён не змірыўся з несправядлівасцю.
Намеснік кіраўніка Аб'яднанага Пераходнага Кабінета, дэлегат Каардынацыйнай Рады Павел Латушка выступіў на мітынгу ў Варшаве, прысвечаным пяцігоддзю забойства Рамана Бандарэнкі.
«Я выходжу» — гэтыя ягоныя словы сталі лозунгам для соцень тысяч беларусаў, а ягоны ўчынак — прыкладам мужнасці і годнасці.
Сёння, ушаноўваючы светлую памяць Рамана Бандарэнкі і ўсіх тых, хто ахвяраваў сваім жыццём дзеля нас, дзеля будучыні нашай дзяржавы, мы павінны казаць вельмі адназначна і ясна: тыя, хто здзейсніў гэтыя жудасныя злачынствы, павінны панесці адказнасць.
Пяць гадоў мы вядзём барацьбу за свабоду і незалежнасць. Мы пакуль не вярнулі Беларусь беларускаму народу, але наш шлях не спыняецца. Пяць гадоў мы змагаемся за тое, каб усе злачынцы, якія парушылі закон і чалавечую мараль, былі прыцягнуты да адказнасці.
Міжнароднае правасуддзе ўжо працуе: ужо выдадзены ордары на арышт прадстаўнікоў рэжыму, вінаватых у катаваннях, Польскай пракуратурай. Спадзяюся, што будуць выдавацца яшчэ больш ордэраў, каб пазней затрымаць і пакараць гэтых злачынцаў. Але без вяртання нашай роднай Беларусі, без вяртання законнасці і правапарадку на нашу зямлю, мы не зможам сапраўды прыцягнуць да адказнасці тых, хто стаіць за гэтымі злачынствамі.
У гэты сумны дзень выказваю свае шчырыя спачуванні сям'і, маці і знаёмым Рамана. А таксама ўсім сем'ям і блізкім, якія з-за тэрору рэжыму Лукашэнкі страцілі сваіх родных. Людзей, якія павінны былі жыць. Іхная смерць — наш агульны боль.
Мы не змірыліся са смерцю Рамана. Мы не забыліся тых, хто яго забіў.
Мы ведаем канкрэтныя прозвішчы. Мы працягнем рабіць усё, што ад нас залежыць, каб Закон вярнуўся ў Беларусь, дзе забойцаў і катаў будзе чакаць справядлівы суд.
Жыве Беларусь!
