«19 верасня 1991 года Беларусь афіцыйна замацавала сваю сучасную назву і вярнула гістарычныя сімвалы» – Павел Баркоўскі
2025-09-19
Прадстаўнік па нацыянальным адраджэнні Аб’яднанага Пераходнага Кабінета, – да гадавіны прыняцця нацыянальных сімвалаў Беларусі – герба «Пагоня» і бел-чырвона-белага сцяга – як дзяржаўных:
«19 верасня 1991 года Беларусь афіцыйна замацавала сваю сучасную назву – Рэспубліка Беларусь – і вярнула ў якасці дзяржаўных герб «Пагоня» і бел-чырвона-белы сцяг. Гэта быў крок, які засведчыў пераемнасць нашай дзяржаўнасці і сувязь сучаснай Беларусі з тысячагадовай гісторыяй.
На працягу стагоддзяў «Пагоня» і бел-чырвона-белы сцяг суправаджалі беларусаў у вырашальных момантах барацьбы за свабоду – ад часоў ВКЛ і БНР да незалежнасці 1991 года і мірных пратэстаў 2020-га.
На жаль, у 1995 годзе гэтыя сімвалы былі замененыя на неасавецкія праз маніпулятыўны і антынацыянальны рэферэндум, што стала спробай абарваць традыцыю і вярнуць Беларусь у таталітарнае мінулае.
Але гэтая спроба была не здольная перакрэсліць ані гісторыі, ані памяці, ані нацыянальнай годнасці.
Гэты дзень – сапраўдны прадвеснік нацыянальнага адраджэння, які сведчыць, што нават нягледзячы на доўгія гады адмовы ад нацыянальнай палітыкі, сапраўдныя каштоўнасці вяртаюцца да жыцця, як гэта адбылося з нацыянальнымі сімваламі ў 2020 годзе.
Для нас яны не толькі гісторыя, але і аснова будучыні, бо ўвасабляюць імкненне беларусаў да свабоды і еўрапейскага развіцця, да ўласнай дзяржаўнасці і незалежнасці.
Таму 19 верасня застаецца днём, які нагадвае нам пра сапраўдную Беларусь і яе шлях – шлях свабоднага народа з уласным імем і сваёй сімволікай».
@CabinetBelarus
