Намеснік кіраўніцы Кабінета Павел Латушка – пра вызваленне палітзняволеных і зняцце санкцый з «Белавія»
2025-09-11
«Мы ўдзячныя Прэзідэнту ЗША Дональду Трампу, спадару Коўлу, спадару Сміту за іх эфектыўныя намаганні па вызваленні палітычных зняволеных. Але мы не забываемся, што ў турмах рэжыму Лукашэнка працягвае знаходзіцца больш за 1300 палітычных зняволеных.
Важна адначасова не забывацца, што з моманту пачатку актыўных кансультацый з дыктатарам Лукашэнкам ён пасадзіў у турмы значна больш людзей. З моманту вызвалення Сяргея Ціханоўскага палітзняволенымі прызнана не менш за 57 асоб. І ключавым пытаннем, якое застаецца на парадку дня, з'яўляецца спыненне рэпрэсій, інакш канвеер не спыніцца.
Як каардынатар санкцыйнай палітыкі ў Аб'яднаным Пераходным Кабінеце хачу адзначыць, што зняцце санкцый з авіякампаніі «Белавія» – гэта крок у інтарэсах беларускага грамадства. Таму што гэта дае магчымасць «Белавія» атрымліваць запасныя часткі абслугоўваць авіяпарк у ліцэнзаваных кампаній. Мы дамагаліся ўвядзення санкцый у тым ліку на «Белавія» для таго, каб у далейшым прымушаць Лукашэнку вызваляць палітычных зняволеных. Гэта той інструмент, які патрэбны і які зараз адыгрывае ключавую ролю.
Трэба памятаць, што калі Лукашэнку не атрымліваецца гандляваць таварамі, ён пачынае гандляваць людзьмі. Таму важна, што ціск на Лукашэнку працягваецца.
Мы за вызваленне людзей, але супраць дыктатур, якія бяруць заложнікаў і гандлююць імі»
@CabinetBelarus
