Павел Баркоўскі: «Змаганне за ідэнтычнасць – адзін з ключавых кірункаў палітычнай барацьбы»
2025-08-05
В.а. прадстаўніка па нацыянальным адраджэнні Аб’яднанага Пераходнага Кабінета ў інтэрв’ю Budzma.org распавёў пра актуальнасць стратэгіі нацыянальнага адраджэння, прынятай яшчэ ў 2023 годзе, і патлумачыў, чаму праца ў сферы культуры і адукацыі з’яўляецца не дадаткам, а асновай змагання за дэмакратычную Беларусь:
📌 Шмат што зроблена, нягледзячы на невялікія магчымасці, якія мы маем, – без доступу да нейкіх дзяржаўных бюджэтаў, без магчымасці ладзіць гэта праз каардынацыю шматлікіх служб і арганізацый.
📌 Мы рыхтуем серыю публікацый з нагоды пяцігоддзя беларускай рэвалюцыі. Гэта будзе аналіз змен і ў сферы культуры, і ў сферы адукацыі, і ў сферы гістарычнай памяці. Гэта ўсё такія падсумаванні – што змянілася ў лепшы ці горшы бок за гэты час.
📌 Калі мы кажам пра стратэгію нацыянальнага адраджэння – гэта не толькі пра сферу культуры. Гэта вельмі вузкае разуменне, што адраджаць ці займацца нацыянальным можна толькі ў сферы культурнай.
📌 Мы кажам пра неабходнасць правядзення працэсаў нацыянальнага адраджэння і ў галіне адукацыі, і ў культуры, і ў палітычнай сферы, і ў эканоміцы, і ў сацыяльнай палітыцы, і нават у прававой і вайсковай сістэмах.
📌 Мы ўвесь час падкрэсліваем, што не з’яўляемся нейкай адзінай арганізацыяй, якая вось гэтым будзе займацца, і што ўсё беларускае адраджэнне стане вынікам нашай працы. Не, мы разглядаемся як пэўны цэнтр крышталізацыі, як пэўныя фасілітатары гэтых працэсаў.
📌 Лічу дасягненнем, якое ўдалося зрабіць у межах дэмакратычных сіл, сярод дэмакратычных палітыкаў – гэта менавіта перакананне большасці дзеячаў, большасці актараў, што культура – гэта не пра падвал ці перыферыю, не пра нешта такое, што можна згадваць напрыканцы сур’ёзнай размовы, нешта малазначнае.
📌 Сёння змаганне за ідэнтычнасць, за тое, каб заставацца беларусамі, а не пераўтварацца ў малы народ Расіі – адзін з ключавых кірункаў барацьбы, палітычнай барацьбы.
@CabinetBelarus
