Святлана Ціханоўская ўручыла ўзнагароды Аб’яднанага Пераходнага Кабінета падчас візіту ў ЗША
2025-05-07
Падчас працоўнага візіту ў Злучаныя Штаты Амерыкі дэмакратычная лідарка, кіраўніца Аб’яднанага Пераходнага Кабінета Святлана Ціханоўская ўручыла медалі «За плённую працу на карысць Беларусі» і медаль Францыска Скарыны прадстаўніцам беларускай дыяспары ў ЗША.
Адпаведныя пастановы аб узнагароджанні выбітных асоб, падпісаныя Святланай Ціханоўскай, Кабінет прыняў 29 красавіка 2025 года і 24 снежня 2024 года. Узнагароды распрацавала Геральдычная рада.
Медаль «За плённую працу на карысць Беларусі» атрымалі:
▪️ Алеся Кіпель — беларуска-амерыканская грамадская дзяячка, юрыстка — за шчырую адданасць беларускай справе, прамоцыю ідэй вольнай і незалежнай Беларусі ў ЗША;
▪️ Алеся Сёмуха-Грынберг — беларуская грамадская дзяячка, спонсарка шматлікіх гуманітарных і культурніцкіх праектаў — за крэатыўную дзейнасць па захаванні і прамоцыі беларускай мовы і літаратуры ў ЗША і ў Беларусі;
▪️Ірына Красоўская — грамадская дзяячка, праваабаронца — за шматгадовую праваабарончую дзейнасць і асабісты ўнёсак у ліквідацыю знікненняў людзей у Беларусі і ва ўсім свеце.
Медалём Францыска Скарыны узнагароджана:
▪️ Наталля Гардзіенка — аўтарка шматлікіх прац па гісторыі беларускай дыяспары — за шматгадовую навуковую і архіўную дзейнасці на карысць Беларусі.
Рашэнні аб узнагароджаннях у Кабінеце прымаюцца калегіяльна, з улікам прапаноў беларускай грамадзянскай супольнасці. Гэта важны і сімвалічны працэс, асабліва з улікам таго, што абсалютная большасць узнагароджаных ніколі не мела дзяржаўных узнагарод і афіцыйнага прызнання ў Беларусі з-за сваёй грамадзянскай і палітычнай пазіцыі.
@CabinetBelarus
