«Хочацца верыць, што ўрок мінулых гадоў быў засвоены»
2025-04-18
Намеснік прадстаўніцы па сацыяльнай палітыцы Кабінета, урач Станіслаў Салавей пракаментаваў рост захворванняў на адзёр у Беларусі:
«Рост выпадкаў адру – заканамерны вынік распаўсюджвання “антываксерскіх“ ідэй, якія праз інтэрнэт атрымалі шырокі доступ да аўдыторыі. Яны знаходзяць водгук як у прыхільнікаў тэорый змовы, так і сярод тых, хто сумняваецца праз недахоп інфармацыі.
У цывілізаваных краінах гэтаму надаюць вялікую ўвагу: медыкі праз СМІ адкрыта тлумачаць наступствы хваробы і падкрэсліваюць, што вакцынацыя – адзіны надзейны і бяспечны спосаб прафілактыкі.
У Беларусі ж Міністэрства аховы здароўя выконвае зусім іншыя задачы – дагаджае дыктатару і стварае карцінку для прапаганды. Хаваючы статыстыку пра ўспышкі адру, яно падвяргае небяспецы дзяцей і спрыяе росту “антываксерскіх“ настрояў. Калі хваробы нібыта няма – то і вакцына нібыта не патрэбная.
Але праўда ў тым, што адзіная рэальная абарона ад адру – гэта вакцынацыя.
Беларусь ужо заплаціла вялікую цану за адмаўленне праблемы падчас пандэміі каранавіруса, калі краінай кіраваў (і, на жаль, усё яшчэ кіруе) антываксер, а Міністэрства аховы здароўя яму падтаквала. Хочацца верыць, што ўрок мінулых гадоў быў засвоены. Нашае здароўе – у нашых руках. Калі ласка, вакцынуйцеся».
@CabinetBelarus
