Вольга Зазулінская – да гадавіны тэракту ў мінскім метро: «Мы нават не ведаем, ці сапраўдныя віноўнікі былі пакараныя»
2025-04-11
Прадстаўніца па сацыяльнай палітыцы Аб’яднанага Пераходнага Кабінета згадала падзеі 11 красавіка 2011 года – выбух у мінскім метро, у выніку якога загінулі 15 чалавек і сотні былі параненыя:
«11 красавіка – дзень, які для многіх беларусаў звязаны з болем і страхам.
Я была на працы, мой сын меў вяртацца з трэніроўкі. Ён не ездзіў у метро, але я чамусьці стала яму тэлефанаваць – напэўна, проста ад трывогі, якая ахапіла ўсіх.
З тых часоў мінула 14 гадоў. Але дагэтуль сем’і ахвяр трагедыі не дачакаліся справядлівасці. І ці ўвогуле справядліва – пацярпець ад злачынства?
Мы нават не ведаем, ці сапраўдныя віноўнікі былі пакараныя. Судовы працэс адбыўся з сур’ёзнымі парушэннямі празрыстасці, а саміх асуджаных расстралялі. Гэта не акт справядлівасці, а спроба паставіць кропку і схаваць канцы ў ваду.
Беларусь – адзіная краіна ў Еўропе, дзе захоўваецца смяротнае пакаранне. І яно можа быць выкарыстана ўладай у любы момант – калі ёй гэта выгадна.
Настане час, калі праўда будзе раскрытая. І толькі тады мы зможам адчуваць сябе ў бяспецы, у справядлівым грамадстве, дзе чалавечае жыццё мае сапраўдную вартасць. Давайце разам набліжаць гэты час».
@CabinetBelarus
