Дэлегацыя Аб’яднанага Пераходнага Кабінета здзяйсняе працоўную паездку ва Украіну
2025-03-21
20 сакавіка ў Кіеве адбыліся панэльныя дыскусіі «Стратэгія дэмакратычных сіл Беларусі адносна Украіны» і «Беларускія добраахвотнікі, ветэраны і валанцёры ва Украіне».
Спікерам на першай панэлі стаў кіраўнік апарату Аб’яднанага Пераходнага Кабінета Валерый Мацкевіч. У мерапрыемстве таксама ўдзельнічаў прадстаўнік па абароне і нацыянальнай бяспецы Кабінета Вадзім Кабанчук. Таксама ў дыскусіях узялі ўдзел намеснік міністра ў справах ветэранаў Украіны Руслан Прыходзька, народны дэпутат Украіны, член міжфракцыйнага аб’яднання «За дэмакратычную Беларусь» Багдан Яраменка, кіраўніца валанцёрскіх ініцыятыў «Сустрэча» і «Беларускі аўтаполк» Алена Жаркевіч.
Абмеркавалі:
- стратэгію дэмсіл Беларусі адносна Украіны і ўзаемную стратэгію Украіны;
- праблемы беларускай дыяспары ва Украіне;
- пытанні сацыяльнага забеспячэння і легалізацыі беларускіх добраахвотнікаў;
- лёсы вязняў лукашэнкаўскіх турмаў, якія апынуліся ў зняволенні за дзеянні ў падтрымку Украіны: антываенныя акцыі, партызанскія дыверсіі («рэйкавыя партызаны») і інш.
Вадзім Кабанчук: «Мы бачым, што ёсць зрухі па беларускім кірунку ад афіцыйнай Украіны. Была шчырая зацікаўленасць. У дыскусіях удзельнічалі прадстаўнікі розных галін украінскай улады, у тым ліку з Офіса прэзідэнта Украіны і Міністэрства па справах ветэранаў. Усе яны выказваліся ў падтрымку беларускіх добраахвотнікаў і дэмакратычнай Беларусі. Яны адзначылі, што ва ўкраінскім грамадстве таксама ёсць усведамленне заслугі беларускіх герояў у гэтай барацьбе».
Мерапрыемства было арганізавана Фондам Фрыдрыха Наўмана за Свабоду (Украіна), аналітычным цэнтрам «Украінская прызма» і цэнтрам «Еўрапейскі дыялог».
Разам з Вадзімам Кабанчуком і Валерыем Мацкевічам ва Украіне знаходзіцца прадстаўніца па сацыяльнай палітыцы Кабінета Вольга Зазулінская.
@CabinetBelarus
